કરપ્ટ જીવન .....

લાંચ તો લેતાં હશો, સાચ્ચું કહો !
ને દગો દેતાં હશો, સાચ્ચું કહો!

દેશને નુકશાન હો, તો મુજને શું?
આવું પણ કે'તાં હશો, સાચ્ચું કહો !

આંખ સામે છો નગર બળતું રહ્યું.
આપ તો, છેટાં હશો સાચ્ચું કહો !

લાગણી પણ ખેલ લાગે આપને.
જડ બની રે'તાં હશો સાચ્ચું કહો.

વીર સૈનિક ની શહીદી વેંચતાં,
પાપીઓ ; નેતા હશો, સાચ્ચું કહો,

છો ને જૂઠી જિંદગી, ચેતન મળી,
આપ પણ એંઠાં હશો, સાચ્ચું કહો !

આપનાં અભિપ્રાય અણમોલ છે......

જય ગુર્જરી,

આપ સૌ ને હોળીની વધાઈ....

ચાલો આજે હોળી રમશું.
દ્વેષ સગળાં છોડી, રમશું.

મહિના વિત્યાં,બોલ્યા પણ ના!
સૌ અબોલા તોડી, રમશું...

શ્વેત - ચોખ્ખું દિલનું પાનું,
પ્રેમ રંગો, બોળી, રમશું.

આંખે-આંખે વાતો થાતી,
ચિતડું કોઈ ચોરી, રમશું.

છો સદા એ લીલા કરતો,
ગોપી તો સૌ ભોળી; રમશું.

રંગ ભગવો,લાગ્યો ભીતર!
માંહે ચેતન ખોળી, રમશું..

હંમેશ મુજબ આપનાં અભિપ્રાય આપશો.

જય ગુર્જરી,

ચેતન ફ્રેમવાલા

બે મુક્તક

છો સ્પંજ કેરું બેડ છે તોય પણ,
લેવી પડે છે ઊંઘ ની ગોળી મને.
ને ફૂટપાથી પત્થરોની સેજ પર,
જો કેટલો આરામથી ચેતન સુવે.

માર્ચ-વેરો

આ માર્ચ મારી નાખે છે,
ભૈ બોજ ભારી નાખે છે.
કે માંડ નવડા મળતા'તા,
એ મીંડા કાઢી નાખે છે.

હંમેશ મુજબ આપનાં કિમતી અભિપ્રાય આપશો.

જય ગુર્જરી,
ચેતન ફ્રેમવાલા

જેવો છું એવો સ્વીકારો......

હું જેવો છું એવો મુજને સ્વીકારો ને!
સાચ્ચો,કડવો,તીખો છું,મુજને માણોને.

આખે આખો સારો છું એવું ક્યાં કહેતો?
થોડા-ઝાઝા દોષો સાથે અપનાવો ને!

શીશા જેવું ચોખ્ખું દિલ લઇને આવ્યો છું,
મુજ દિલમાં ડૂબી જાઓ,મુજને તારો ને!

ચાહતની સોગાદો આપે પરને વાંટી,
થોડી બસ થોડી ચાહત મુજને ફાળો ને!

શંકાની નજરે શાને મુજને જૂઓ છો,
શંકાથી પર કો'દી મુજને આણો ને!

જડ થઇ ગ્યો છું,ભૌતિકતાના દાવાનળમાં,
જડ હૈયામાં ચેતન જેવું સંચારો ને!

હંમેશ મુજબ આપનાં કિંમતી અભિપ્રાય આપશો .

જય ગુર્જરી,
ચેતન ફ્રેમવાલા

૨ જી ઑક્ટોબર

લૂંટો હજી,
છે ઘડીયાળ,ચશ્મા ને છે લાકડી,
ને બીજું આ વસ્ત્ર રહ્યું છે બાકી,
લૂંટો હજી , એને લૂંટો હજી............

લૂંટો હજી,
આ મૂઠ્ઠીભર હાડકામાં રહી ગયેલી ચેતનાઓ,
એ આત્માને ,જેણે સહી છે ઘણી વેદનાઓ.
લૂંટો હજી એને લૂંટો હજી..............

લૂંટો હજી,
કે નામ એનું છે હજીયે ઊપયોગી,
અવમુલ્યન પહેલાં જલ્દી લ્યો ભોગી.
લૂંટો હજી એને લૂંટો હજી...............

લૂંટો હજી,
છે ઘણી એના આદર્શોની ચોપડીઓ,
આદર્શો વેંચી ભેગી કરી લો થોકડીઓ.
લૂંટો હજી એને લૂંટો હજી...............

લૂંટો હજી,
રાજઘાટ પર ધરી થોડી પુષ્પાંજલી,
સત્તા-ગાદી પર પાથરી થોડી ખાદી,
તાંતણે તાંતણે ચેતન લૂંટો હજી,
લુંટો હજી એને લૂટો હજી................

૨જી ઑક્ટોબર ૧૯૮૧
હંમેશ મુજબ આપના કીંમતી અભિપ્રાય આપશો.


જય ગુર્જરી,
ચેતન ફ્રેમવાલા

આઝાદી ........

આપ સૌ ને 60મા આઝાદી પર્વ ની હાર્દીક શુભકામના........


રોટી માટે લોકો લડતાં,ચાલો ઉજવો આઝાદી.
બાળક છોને ભુખ્યાં મરતાં,ચાલો ઉજવો આઝાદી.

મત આપીને ખુરશી આપી, આપ્યું ભારત સાચવવા,
નેતા નામે નાગો ડસતાં,ચાલો ઉજવો આઝાદી.

આખો મહિનો કાળી કસરત, બન્ને જણ કરતાં તોયે,
ક્યાં કોઈ દી' નવડાં મળતાં,ચાલો ઉજવો આઝાદી.

નાના-મોટા કોઈ કામો,ક્યાં સ્હેલાઈથી થાતાં.
ભ્રષ્ટો હર શ્રણ ખીસ્સા ભરતાં, ચાલો ઉજવો આઝાદી.

નાની અમથી ભૂલો માટે વર્ષો વિતતાં જેલોમાં,
અપરાધી સૌ ખૂલ્લાં ફરતાં,ચાલો ઉજવો આઝાદી.

અબળાને સબળા કરવાના જૂઠા વાદા છો થાતાં.
અત્યાચારો રોજે વધતાં,ચાલો ઉજવો આઝાદી.

સચ્ચાઈના મૂલ્યો મોટા,ગાંધીજી તો કઇ ગ્યા'તાં.
સાચ્ચું ક્હેતાં ચેતન ડરતાં,ચાલો ઉજવો આઝાદી.

હંમેશ મુજબ આપનાં અમૂલ્ય અભિપ્રાય આપશો.
જય ગુર્જરી,
ચેતન ફ્રેમવાલા.

25 વર્ષે શાળાની યાદો…

શાળા છોડ્યા ના(૧૯૮૨થી) 25 વર્ષ બાદ 145 માંથી 67 મિત્રોને ભેગા કરી, સહકુટુંબ મળવાનો લ્હાવો ૧૦મી જૂન ૨૦૦૭ ના મળ્યો.
એ પ્રસંગે લખાયેલી ગઝલ.


શાળા છોડી, પણ ભુલ્યા ક્યાં.
યાદો થોડી, પણ ભુલ્યા ક્યાં.

છો ગણિત-ભાષા માં, કાચા,
ચીઠ્ઠી-કૉપી, પણ ભુલ્યા ક્યાં.

બેંચ ઊપર ઊભા કરતાં,
ડસ્ટર-સોટી, પણ ભુલ્યા ક્યાં.

રાજ-પિપળા ,નાવ્હા ગ્યા’તાં,
કાચી રોટી, પણ ભુલ્યા ક્યાં.

દિલમાં ઊગ્યાં પ્રેમ-પુષ્પો,
મ્હેક નો’તી,પણ ભુલ્યા ક્યાં.

કાને કાને વાતો થાતી,
સાચી-ખોટી,પણ ભુલ્યા ક્યાં.

આ છે મારો ! પેલી મારી!
અમથી જોડી,પણ ભુલ્યા ક્યાં.

ચાલો ચેતન, નાના થઇએ,
આંખો રોતી, પણ ભુલ્યા ક્યાં…….

હંમેશ મુજબ આપનાં કિંમતી અભિપ્રાય આપશો.

જય ગુર્જરી,
ચેતન ફ્રેમવાલા