૨૦ વર્ષ જૂની યાદની ........ એક નવી ગઝલ.......

જ્યાં જરી આકાશ જો ઘેરાય છે
યાદનાં વાદળ વરસતાં જાય છે.

હું અરીસે મુજને શોધું, પણ પ્રિયે,
તું જ કાં એમાં સતત દેખાય છે ?

આંગળી બસ તેં અડાડી એટલે,
એ લજામણ છોડ શી બીડાય છે .

આમ તો ના-ના કહે છે એ હજી
મન મહીં તો એ હવે હરખાય છે.

આંખ જો ખોલું, તો તું ભાગી જતી
બંધ આંખે, હાજરી વર્તાય છે.

તું હશે, હું એમ માની દોડતો
બારણે જ્યારે ટકોરા થાય છે.

હો સુગંધો પ્રેમની, ચેતન ઘણું.
એટલામાં વેદ સગળા માય છે.


આપનાં અમુલ્ય અભિપ્રાય અનિવાર્ય છે..

જય ગુર્જરી.
ચેતન ફ્રેમવાલા